Хэнтий аймгийг Түүхэн аялал жуулчлалын бүс болгох Засгийн газрын шийдвэр гарсны дагуу уг цогцолборыг тус суманд барих ажил эхлээд байна. Энэхүү түүхэн цогцолборыг байгуулах төслийг УИХ-ын гишүүн, ЗГХЭГ-ын дарга Л.Оюун-Эрдэнэ анх санаачилж, Байгаль орчин аялал жуулчлалын яам дэмжин ажиллаж байгаа юм.
Цогцолбор баригдаж буй энэхүү газарт 1206 онд Чингис хаан Их хуралдайгаа зарлан хуралдуулж Их Монгол улсыг анх байгуулсан түүхтэй. Монгол төрийн гал голомт, түүхэн дурсгалт газар учраас гадаад, дотоодын жуулчдын зорьж ирэх газар болно гэж уг төслийг санаачлагчид тооцож байна. Цогцолборын дотоод засал, нарийн чимхлүүр ажлуудыг Монгол Улсын Урлагийн гавьяат зүтгэлтэн, уран сийлбэрч Д.Төртогтох гүйцэтгэх бөгөөд гүйцэтгэгчээр шалгарсан "Мөнх өргөө” ХХК ирэх намар ашиглалтад хүлээлгэн өгөх юм байна.
Цогцолборын бүтээн байгуулалтын ажлын явцыг УГЗ Д.Төртогтох, төслийн багийн удирдагч Н.Батбаяр нар Ерөнхий сайд У.Хүрэлсүхэд дэлгэрэнгүй танилцуулсан. Ерөнхий сайдын хувьд төслийн багийнханд амжилт хүсээд барилгын чанарт анхаарч, гэрээт хугацаандаа ашиглалтад оруулахыг хүссэн юм.
Монголын төр улс анх үүссэн энэ газарт томоохон цогцолборыг барьж, хожмын үр хойчдоо түүхэн өв үлдээх нь Засгийн газрын үүрэг. Энэ том цогцолборыг зорьж ирэх түүхэн аялал жуулчлалын жим эхэлж байна гэж ойлгох хэрэгтэй. Жилдээ нэг удаа УИХ хүндэтгэлийн чуулганаа энд хуралдуулах ч боломжтой” хэмээн онцоллоо.
