Албан тушаалтнуудын утасны төлбөрийг нийслэл төлөхгүй

Нийслэлийн Засаг дарга бөгөөд Улаанбаатар хотын захирагч С.Батболд өнгөрсөн баасан гаригт төсвийн шууд захирагч, ахлах нягтлан бодогч нарт зориулан зохион байгуулсан "Санхүү, төсвийн талаар баримтлах бодлого, чиглэл цаашид анхаарах асуудлууд” сэдэвт сургалтад оролцжээ. 

Сургалтаар "Төсөв, санхүүгийн талаар баримталж буй бодлого чиглэл”, "Өрийн удирдлагын бодлого, чиглэл”, "Дотоод аудит, Шилэн дансны хуулийн хэрэгжилт”, "Төрийн сангийн төлбөр тооцооны журам, 2016 оны төсвийн жил дуусгавар болж байгаатай холбогдуулан анхаарах асуудлууд” зэрэг сэдвээр салбарын мэргэжилтнүүдээс мэдээлэл сонссон төсвийн шууд захирагч, ахлах нягтлан бодогч нарт хандан хотын дарга хэлсэн. Тэрбээр ирэх онд нийслэл хэмнэлтийн хатуу горимд ажиллах ёстойг анхааруулаад "НИТХ-ын хуралдаанаар нийслэлийн эдийн засаг, нийгмийг хөгжүүлэх 2017 оны үндсэн чиглэл, 2016-2020 оны үйл ажиллагааны хөтөлбөр болон 2017 оны төсвийг хэлэлцэж баталсан. Ирэх онд төсвийн байгууллагын орон тоог нэмэхгүй байх, төрийн өмчийн аж ахуйн нэгжүүдээ ашигтай ажиллуулах, эрх бүхий албан тушаалтнуудын гар утасны төлбөрийг нийслэлийн төсвөөс санхүүжүүлэхгүй байх, шатахуун бага зарцуулдаг автомашин хэрэглэх зэрэг хэмнэгдсэн горимд шилжин ажиллана. Эдийн засгийн хямралыг даван туулахад хэмнэлтийн горимыг сайтар хангаж, үргүй зардал гаргуулахгүй байх талд та бүхний хүчин чармайлт хамгаас чухал юм шүү” хэмээн онцгойлон захьсан байна.

ЭХ СУРВАЛЖ: ДОЛОО ХОНОГ ТУТМЫН УЛААНБААТАРЫН СОНИН

Сэтгэгдэл:

Сэтгэгдэл нэмэх