“Ацаг шүдний зөрөө” уран сайхны кино нь нэрт найруулагч Б.Балжиннямын бүтээл бөгөөд 1985 онд үзэгчдэд хүрчээ. Кино зохиолыг М.Ринчин, Д.Мягмарсүрэн нар бичсэн бол, киноны зураачаар Л.Махбал ажиллажээ. 40 жилийн өмнөх киноны энэхүү зурагт хуудас нь өдгөө Монголын Театрын музейн сан хөмрөгт хадгалагдаж байна.
Ардын хувьсгал ялсны дараа хөгжлийн шинэ замд орсон Монгол орныг эдийн засгийн хувьд унагахыг гадаад дотоодын дайснууд санаархаж, элдвийн хорт явуулга хийж байсныг харуулсан адал явдалт кино. Кинонд Сан бэйсийн хүрээн дахь салбар банканд хуурамч мөнгө илэрснээр үйл явдал өрнөж, хуурамч мөнгө үйлдвэрлэгчдийг чекистүүд мөрдөн илрүүлж буй тухай өгүүлдэг үзэгчдийн сэтгэлд үлдсэн уран сайхны кино билээ.
Эх сурвалж: ubsonin.mn
