ОЛОН УЛСЫН ХӨДӨЛМӨРИЙН БАЙГУУЛЛАГЫН ХӨДӨЛМӨРИЙН ХЯНАЛТЫН ТУХАЙ 81, 129 ДҮГЭЭР КОНВЕНЦ СОЁРХОН БАТЛАХ ТУХАЙ ХУУЛЬ БАТЛАГДЛАА
Олон Улсын Хөдөлмөрийн Байгууллагын “Аж үйлдвэр, худалдаан дахь хөдөлмөрийн хяналтын тухай” 81 дүгээр конвенц, “Хөдөө аж ахуй дахь хөдөлмөрийн хяналтын тухай” 129 дүгээр конвенц нь хүний хөдөлмөрлөх эрхийг хэрэгжүүлэх, хөдөлмөрийн хууль тогтоомжийн хэрэгжилтийг хангах, ажил хөдөлмөр эрхлэгчдийн хөдөлмөрийн аюулгүй байдал, эрүүл мэндийг хамгаалах үр дүнтэй хөдөлмөрийн хяналтын тогтолцоо, засаглалыг бэхжүүлэхэд чиглэгддэг.
Гэр бүл, хөдөлмөр, нийгмийн хамгааллын яамнаас Олон Улсын Хөдөлмөрийн Байгууллагын стандартад нийцсэн хөдөлмөрийн хяналтын проактив буюу болзошгүй эрсдэлээс урьдчилан сэргийлэх аргачлалыг нэвтрүүлэх, Олон Улсын Хөдөлмөрийн Байгууллагын хөдөлмөрийн хяналтын тухай конвенцод нэгдэж, олон улсын түвшинд тавигддаг нийтлэг шаардлагыг хангасан хууль эрх зүйн орчныг бүрдүүлэх зорилтыг тавин ажиллаж байна.
Олон Улсын Хөдөлмөрийн Байгууллагын хөдөлмөрийн хяналтын конвенцод нэгдэн орсноор
Хөдөлмөрийн хяналтын тогтолцоог олон улсын нийтлэг зарчимд нийцүүлэн бэхжүүлэх, Хөдөлмөрийн хяналтын байцаагчдын чадавхыг сайжруулах, хараат бус, эрсдэлд суурилсан проактив шинэлэг хяналт шалгалтын арга хэлбэрийг нэвтрүүлэх;
Хөдөө аж ахуйн болон аж үйлдвэрлэлийн шинж чанар болон ажлын байрны онцлогт нийцүүлэн хөдөлмөрийн хяналтын үр нөлөөг сайжруулах;
Салбарын ажиллагчдын хөдөлмөрлөх эрх зөрчигдөх, үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх чиглэлээр хөдөлмөрийн хяналтыг боловсронгуй болгох;
Торгууль, шийтгэл хүлээлгэхээс илүүтэй ажил олгогч, ажилтанд хууль тогтоомжийн хэрэгжилтийн талаар мэдээлэл өгөх, зөвлөн туслах замаар хяналтын үр нөлөөг нэмэгдүүлэх зэрэг ач холбогдолтой юм.
Тус конвенцуудад нэгдэн орох хуулийг дэмжин баталсан УИХ-ын гишүүддээ талархлаа
