ЛАМЫН ГЭГЭЭНИЙ 380 ЖИЛИЙН ОЙГОО 380 БҮТЭЭЛЧ АЖИЛТАЙГААР БАЯНХОНГОРЧУУД УГТАНА
Хаврын тэргүүн сарын шинийн 15-ны билэгт сайн өдөр Монголын шашны гурван зулын нэг, оточ маарамбын оройн дээд чимэг Ламын гэгээн Лувсанданзанжанцаны мэлмий гийсний 380 жил, түүний наймдугаар дүр Данзанжамбалчойжишинэн гэгээнтэнд бат оршил өргөх даншиг наадмыг зохион байгуулах комисс анхны хурлаа хийлээ.
Аймгийн ИТХ-ын ээлжит 15-р хуралдаанаар тус ойг хийх ажлын хэсгийн бүрэлдэхүүнийг баталсан. Энэ хүрээнд баяр наадмыг зохион байгуулах комиссын даргаар аймгийн Засаг дарга Г.Батжаргал, нарийн бичгийн даргааар ЗДТГ-ын дарга Ц. Дашцэрэн нар томилогдон ажилдаа ороод байна. Тус комисс дотроо ажил үүргийн тус бүрийн чиглэл бүхий 13 ажлын хэсэгтэй байгуулагдаж байна.
Ламын гэгээний 380 жилийн ойг ирэх 07-р сарын 26, 27, 28-ны өдрүүдэд тэмдэглэх тухай саналаа МУ-ын Засгийн газарт хүргээлээд байгаа ба эл түүхт ойгоо Баянхонгорчууд 380 бүтээлч ажил өрнүүлж угтахнээ.
Баяр наадмын хүрээнд 256 бөхийн үндэсний бөхийн барилдаан, сурын харвааг нээлттэй явуулах бол шагайн харвааг их тойром хэлбэрээр зохион байгуулахаар төлөвлөөд байна. 6 насын хурдан морины уралдаанаас гадна жороо морины уралдаан, сайхан морьтой гоё ганган хос шалгаруулах зэрэг уралдаануудыг монгол ахуй ёс жаягийг олон нийтэд сурталчилах үүднээс тус бүр зохион байгуулна.
Мөн ойн хүрээнд амжиргааны баталгаажих түвшингээс доогуур орлогтой 380 өрх айлруу чиглэсэн зорилтот томоохон арга хэмжээг зохион байгуулахаар боллоо
Ирэх 26-ны өдөр ойг зохион байгуулах комисс өргөтгөсөн бүрэлдэхүүнтэйгээр дахин хуралдаж ойн хүрээнд зохион байгуулах ажил арга хэмжээ нэг бүрийг нарийвчлан төлөвлөж хэлэлцэн батлах болно.
